Na Manzah Kisittel Zel In

Tangvalno khat zatui zuakna ah sumpia aa akikawm phone mek in nupi khat hopih hi. Zatui-zuakpa in a kiho teng uh a zatui zuak kawm in hong za kha hi.

“Hehpihna tawh na lopa meet dingin nasep nong pia thei ding hiam?” ci-in phone sunga akihopih nupi kiangah tangvalno in gen hi.

“Ka lopa hong metsak mikhat nei khin ing, nasem kisam nawn keng” ci-in nupi in dawngkik hi.

Tangvalno in, “Tu aa na nasempa hong lak lawhman a lang bek hong la in tua zah mah aa hoih in hong meet sak ding hing” ci hi.

“Tu laitak aa ka lopa hong meetsak tangvalno nasep pen ka lungkim mahmah khin hi” ci-in nupi in dawngkik hi.

“Kei hong cial le cin, na lopa bek hilo lampi gei paina te, mipai na lampi te leh na innkiim teng hong hahsak sitset ding hi veng.” ci-in tangvalno in kunh kik hi. “Khua sungah a hoih pen innmai lopa a nei dingin hong hahsak ding hing” zong ci lai hi.

“Lungdam ei. Ken lopa meet kician nei khin ing” ci-in nupi in lungkim huaitak in dawngkik hi.

Maitai siusiau kawmsa in tangvalno in a phone khia kik hi.

A kihona khempeuh uh a za zatui-zuakpa in tangvalno hong naih aa, “Na lungsim puakzia hong paakta mahmah ing. Kei kiangah nasep na ut hiam?” ci-in dong hi.

Tangvalno in, “Ai, phamawh kei ei, lungdam lua” ci-in damtak in dawngkik hi.

“Den mah in nasep khat deih aa kunh keei hilo na hiam” ci-in zatui-zuakpa in a dot kik ciangin,

“Hi kei, pu. Ka nasepna lungkim huai takpi hiam cih a sittel kik hi’ng. Den aa ka kihopih nupi kiangah nasem lopa meetpa pen keimah hi’ng” ci-in tangvalno in dawngkik hi.

Hih in eimau-manzah ki-etkikna ahi hi. Midangte sepna leh bawlna te en in kitehkaak lo zaw in, eimau sepna leh bawlzia te hoihtak ki-enpha aa kisittel det ding pen thupi mahmah hi. Na manh zah nang mah in na kisit ding thupi hi. Tua ciang bek in na khangto thei ding hi.

Na hih na khempeuh ah mite’ muan leh pahtaak na hi hiam? Minphatna in sum le paai sangin manpha zaw ahih manin na sepna peuh ah citak leh muanhuai tawntung in.

Paunak 22:1 [ZIV] Hauh mahmah sangin min hoih deihhuai zaw a; ngun le kham sangin mite sangmuhna hoihzaw hi.