Khawl Kei inla, Mainawt in
Bangzah takin lauhuai in haksa taleh, lungkia lo in mainawt den in
TANGTHU
10/17/20232 min read
Nikhat nungak khat le a pa motor tawh khualzin uh hi. Lamkal ah huihpi nung ahih manin, nungak in a pa kiangah, “Pa aw, bang cih ding, motor ka khawlsak ding hiam?” ci-in patau kawmsa in dong hi.
A pa in, “Khawl kei inla hawl suak in” ci hi.
Huihpi nasia semsem ahih manin a nung leh mai vua om motor dangte khawl diamdiam uh hi.
“Bang cih ding ka hiam?” ci-in nungak in a pa dongkik leuleu hi.
A pa in “Khawllo in hawlsuak in” mah ci teitei hi.
Amai deuh vua pei 18 nei motor gol te zong lamnawl neh in khawl diamdiam uh hi. “Pa aw, ei zong i khawl kul ding hi.
Huih leh guah tam ahih manin a mai lam zong saupi kimu thei lo hi. Lauhuai lua hi, mi khempeuh zong khawl uh hilo maw” ci-in nungak in a pa kiangah kun hi.
Huihpi nasia mahmah lak ah khawllo in a hawlsuak veve na dingin a pa in thupia hi. Sawtlo tak a hawl khit ciangin lampi hong vangsuah zaw deuh hi. Tai pawlkhat hong pai khit uh ciangin van hong siang zaw deuh aa, huih nun hong nemzaw deuh hi. Tawmvei a pai lai khit uh ciangin leikeu in guah zuklohna huih a hatlohna mun hong tung uh hi.
A pa in, “Tun motor khawlsak inla motor sung pan pusuak oo” ci in gen hi.
Nungak in, “Banghangin tun khawl ding?” ci in lamdangsakna tawh a dot kik ciangin, “Huihpi a hat mahmah hangin lungkia lo, laulo in mainawt in hawlsuak na hih manin, motor sung pan na pusuah ciangin huihpi lau in a khawl mite tu dong huihpi lak ah a omna uh en kik thei ding hi teh” ci-in a pa in gen kik hi.
Lampi ah lauhuai in, gim in tawl kha mah ding hi teh. Ahi zongin, lungkia kei inla mainawt in. Na haksatna-te leh na gim na tawlna-te hun khat ciangin leh-et kik hithiat ding na hi hi. Na mainawt kei aa, na tawpsan leh, tua haksatna leh gimna te sungah na awkcip lel ding hi.
Late 46:1-4, 7 [ZIV] Pasian in eite belh le i thahatna hi-a, lungkhamhunin hong huhpah lianlian hi. Tua ahi manin leitung kikhina tuipi laizang ah mual lianpite pukin tuite hawkin phuan a, amaute kilawhna hangin mual liante a kiling zongin i lau kei ding hi. Thahatpen TOPA in eite hong ompih a; Jacob Pasian eite kulh muanhuai ahi hi.
Tangthu: Malladi Venkata Krishna Murthy