Kei mah ahaipen kahi mawk a

Sammetsai khat ah sammet ding ngakin mi dim in om hi. Tua laitak in naupang pasalno khat hong lut hi. Tua hong lut pasalno en kawmsa in, sammetpa in a sammetsak pa (customer pa) huau kawm in, “Leitung a om naupang ka theih lakah hih naupang mah hai sa pen ing. Na en le cin” ci hi.

Sammetpa in a ip sung panin dollar pek khat leh dollar maat-tang nih (two quarters) hong lakhia aa, naupangpa kiangah, “Koi deih zaw na hiam?” ci in dong hi.

Naupangin maat-tang nih la in pusuak vingveng hi.

“Kong ci na? Nak hai hi ven. Cik mah ciang pil ngei ken teh!” ci-in sammetpa in a customer-pa kiangah nui buahbuah kawmin gen hi.

Tua zawh a sawtlo in sammet aman ciangin tua customer-pa a pusuah leh, ice-cream zuakna sai panin tua naupangno ice-cream tawikawm sa in hong pusuak mu hi.

“Hey, hong pai dih oo. Kong dot nop khat om. Banghangin dollar pek khat sangin maat-tang nih teel zaw na hia? ci-in customer pa in a dot leh,

Ice-cream tawp dakdak kawmsa in, “Tua dollar pek khat la hi leng, nidang ciangin tua banga hong teelsak nawnlo ding aih cianga” ci-in naupang in dawngkik hi.

Midangte haisa in i zahpih bawl khak leh, ei ahaizaw hi thei kha ding hi hang.

“Mihing a hai omlo aa, ngaihsutna kibanglo bek ahi hi” – Pi Don