Ka Pa in Hong Dawn Ding

Kum 13 a pha tangvalno khat nitumna lam zuan in a zin meileng tungah lungkim tak in hong tu phiuphaiu hi. Tua ni pen nisa in khualum mahmah ta leh, maitai hiuhiau in lungkim tuak mahmah hi.

Khualzin dangte ahih leh khualum leh leivui tamna hangin phun nuknuk uh hi. Pawlkhat in meileng lampi hoihlohna hangin a kilok langhlangh teng nuamsa lo in phun uh hi. Khualzin a tamzaw te tua bangin maitai hetlo in om ciat uh hi. Tua ni aa khualzin pen tawldam huai hetlo in gimhuai in lamsau phadiak tawh kibang hi.

Tangvalno ahih leh midangte nopsakloh phunna ahi khuakeu leivui nisa lak ah nopsak tuak mahmah in lungkim tuak mahmah hi. Tangvalno maitai hiuhiau in aom lamdang sa ahih main theihnopna tawh akiangah a tu nupi khat in, “Ka tapa aw, hih khualum te ciimtak lo na hiam, nisa leh leivui hangin nang gim selo na hiam? ci-in hong dong hi.

“Nupi aw, tawm bel gim mah ing. Ahi zongin phamawh sa lua keng” ci-in tangvalno in dawngkik hi. Nupi nu in banghangin maw ci in dongkik ding a cih laitak in, tangvalno in, “banghang hiam cih leh, Winnipeg (akhawlna ding mun) ka tun ciangin ka pa in kei hong dawn ding hi” ci hi.

Hih leitung in i khualzinna mun hi. Gimhuai in tawldamna omlo kha ding hi. Kiim le paam huzaap te in nisa bangin hong huul in hong kangtum dek zel thei aa, leivui bangin siatna leh gitlohna kizeel hi. Ahi zongin Vantunga om i Pa in khualzinna mongah eite hong dawn dingin hong ngak in om hi. Khualzinna lampi in haksa in sau kha ding hi. Gimna, tawlna, haksatna, vangik leh lungkiatna te nawk kha mah ding hi teh. Khualzinna a bei ciangin hong dawn ding Pa’ maitang muhna ding ngaihsun kawm in kalsuan le cin, na khualzin lamzang in tawldam ding hi.

Matthew 11:28 [ZIV] Vangik pua a gim mite khempeuh aw, ka kiangah hong pai ta un; tawldamna kong pia ding hi.

Mangmuhna (Kilaakna) 21:3-4 [ZIV] Kumpi tokhom panin aw ngaih mahmah khat ka za a, "Tu-in Pasian tenna mite tawh om khawm ta dinga, amah amaute tawh a teng khawm ding hi. Amaute ama mi hi ding uh a, Pasian mahmah amau tawh om khawmin, amaute Pasian hi ding hi. Amah in amaute mit-a khitui khempeuh a nulsak ding hi. Alui nate paizia mangthang zo ahi manin tua lai-ah natna, sihna, thumna, kahnate a om nawn kei ding hi," a ci hi.

Tangthu: Signs of the Times E-mail Newsletter, August 2006.