Ka Nuntakna ah Hong Suak In

Kum kua apha Jack pen tan li (grade 4) kah dinga kilawm himahleh tan nih (grade 2) asin naupangno khat ahi hi. A lawmte sangin a pumpi a golzawk hangin a lungsim ngaihsutna zekai in ze-ol zaw khat ahi hi. Maizum thei in kamtawm khat hi lai hi. A lawmdangte in simmawh lo napi, amah le amah nuamsa lo in milak ah zong kihel nuam mello hi.

Christmas hun hong nai ciangin, a sangkahna ah kumsim-a kinei Christmas tawh kisai pawilahna dingin kigin hun hong tungta hi. Amau tan (class) in Jesu suahna limlak dingin geel uh aa, limlahna ah a kihel ding naupangte amau sep ding zia kiseh ciat hi. Pawlkhat vantungmite, tuucingte, mipilte, leh Mary, Joseph cih bangin kiseh dimdiam uh hi. Jack in amah bangah kiseh ding cih ngak in a om laitak in, a siamanu in, “Jack, nang zinbuk-neipa ding hi ciai” ci-in gen hi. Ama pau ding pen kammal gualnih khawng bek hi aa, Joseph leh Mary te kiangah zintunna inndei awnglo ahihna a gen ding bek ahi hi.

Pawilahni a tunma in hoihtak in kisin uh aa, naupangte in amau lah ding ciat hoihtak in thei khinta uh aa siam mahmah uh hi. Jack zong ama gen ding laigual nihte siangtak in gen thei aa, siam mahmah hi.

A ngaklah mahmah uh Christmas Pawilahni hong tung petpet ta aa Joseph leh Mary te zong Nazareth panin Bethlehem zuan in hong pai uh hi. Jack in ama hun tun ding angak kawmin alawmte limlahte en aa, Joseph le Mary te khualzinna amuh ciangin gimtuaksa in hehpihhuai zong sa hi.

A sawtlo in Joseph leh Mary te Bethlehem hong tung uh aa, zintunna ding mun zong uh hi. Jack zong lalcin tawi kawmin zinbuk mai ah ding hi. Joseph leh Mary te zinbuk kiang hong naih hi.

“Bang kisam na hi uh hiam” ci-in Jack in dong hi.

“Zintunna ding mun a zong hi ung” acih ciangin,

“Mundangah va zong un, hih lai ah zintunna ding inndei awng nawnlo hi” ci-in Jack in gen kik hi.

“Pu aw, mundang khempeuh ka zon uh hangin mun awng khat zong omlo hi. A gamlapi panin hong zin ka hi uh aa, gim mahmah hi ung” ci-in Joseph in naungek puantawh tuun in a gim mahmah Mary kawi kawm in,

“Mun khat peuh awnglo hiam? Ka zi gimlua zo hi” ci beh lai hi.

“Mun awng om nawnlo hi, paikhia un” ci-in Jack in nihvei tak genbeh hi.

Dahmai pua kawmin Joseph in itna leh hehnepna lim tawh Mary a kawikawm in paikhia dingin hong kihei uh hi. Zinbuuk-neipa a inn sungah lut nailo in Joseph leh Mary tawmvei hong en lai hi.

A kongkhak ah Jack adin kawmin, amaitangah dahmai pua in, khitui a mit sungah dimlet ahih manin khamzawhloh in a biangah hong tak suk datdat hi. A aw neihzah tawh, “Joseph, paikhia kei vou. Mary leh naungek hong paipih kik in. Keima lupna inndei ah hong taam un” ci-in hong awng hi.

A lawmte leh a siamanu in lamdangsa in amau geelna leh sinna in hih bang hilo hi. Pawi-en mite in nuihsan uh aa, ahi zongin lamdangsakna tawh hong daididee kik uh hi. Jack zong kisuang piansa in a omna ah dingsuak hi. Tua laitak in mipi lak ah papi khat hong dingto in khut hong beng hi. A dangkhat in hong zom aa, khat khit khat dingto in pawi-en mi khempeuh in tuani in Christmas deihna taktak hong telcian thei uh hi.

Nang mawhna hangin singlamteh tungah a si dingin hong suak Jesu na nuntakna ah mun na piakhin hiam? Na piak naikei leh tuni-in na lungtang sungah Jesu mun pia in. Na lungtang kongbiang ah dingin kongkiu in Jesu a omlam mangngilh kei in.

Mangmuhna 3:20 [ZIV] Hih lai-ah ka om hi! Kongkhak ah dingin ka kiu hi. Mi khatpeuh in ka aw za a, kongkhak hong hon leh ka lut dinga, amah tawh an nekhawm in, amah in kei tawh a nekhawm ding hi.

Kumpi apiang ding a suak naungek tampi om aa, ahi zongin Kumpi pan in naungek in hong suak khat bek om hi.

Pasian piang nuam mihing tampi a om hangin mihing a hong piang nuam Pasian khat bek om hi.

JESU AW TUNI IN KA NUNTAKNA KHEMPEUH AH MUN HONG LA INLA KA LUNGSIM SUNGAH HONG TENG IN!!!