Itna tawh Pantah in Maisak In

Hun khat lai in, Pasian thu sinna leh kipattahna sang khat ah a minthang mahmah sia khat om hi. Sangnaupang zong tampi om uh hi. Tua siapa thuhilhnate muibun in man nei mahmah ahihmanin sangnaupang tampite zong thuhilh dinmun ah khangto thei uh hi.

Ni khat, sangnaupangte lak ah khat in a lawmte van a guksak lam kithei aa siapa kiangah kipaipih hi. Ahi zongin siapa in bangmah daanpiakna neilo hi.

Ni pawlkhat khit ciangin tua sangnaupang mah midang van a guksak lam kithei leuleu in siapa kiangah a kipaipih hangin bangmah gawtna daanpiakna pia tuanlo hi.

Hih thu hangin sangnaupang dangte heh mahmah uh aa, tua guta sangnaupang a kihawlkhiat nadingin ngen uh hi. Tua sangnaupang a kihawlkhiat kei leh amau adangte a vek un sang panin paikhia ding uh ahih zong teltak in a siapa uh theisak uh hi.

Siapa in zong sangnaupang teng khempeuh kaikhawm in kimuhkhopna sam hi. Sangnaupang khempeuh a kim ciangin, “Note pen sangnaupang hoihte na hi uh aa, a sia leh a pha teltak in a khen thei te na hi uh hi. Hih sang panin paikhia le uh cin, sang dangah na zop theihna dinguh bangmah haksatna leh buaina om hetlo ding hi. Ahizongin, sia leh pha hoihtak in a khentel theilo na sanggampa uh hih sang panin paikhia leh bangci mawk ding hiam? Ken hilh kei leng kuan hilh ding hiam? No teng khempeuh kong suplawh zah dong ahi phial zongin na sanggampa uh sang hawlkhia in paikhia sak zolo ding hi’ng” ci-in siapa in gen hi.

Van a gu tangvalno biangah mit sung panin a khamzawh loh khitui te hong luang suk detdet hi. A nuntakna sungah khat vei beek midangte na gu kik nawnlo aa, a nung ciangin a siapa mah bangin a muanhuai siapi khat hong suak thei hi.

John 8:11 [ZIV] Numei in, "Kuamah in hong mawh paih kei, sia aw," a ci hi. Jesu in, "Ken zong kong mawhpaih kei hi, tu-in pai inla, mawhna tawh na nuntakna pen na nusia in," ci-in a thuhilh hi.