Huhna Neuno in Nuntakna Khel

Nikhat sang panin inn lam zuan in khe tawh Mark a ciah laitak, amai a tangval khat lampi sikkial kha ahih manin a khut ah a tawi vante ahi laibu pawlkhat, puansilh nih, baseball satna khat, khuttuam khat, leh awkhumna khat lampi tungah kiatsuah ziazua hong mu hi.

Mark zong khukdin suk in tangvalno laibu leh a vanteng toppih hi. A ciahna lampi uh kibang ahih manin a vante pawlkhat zong Mark in tawipih lai hi. Hong ciah kawm un a ki hoho uh leh tua tangvalno min pen Bill ahihna leh baseball kimawl uk khat ahihna Mark in hong theih beh hi. Bill in sanglai te zong zo mello in a lawmngaihnu tawh zong kikhen ahihna hong thei lai hi.

Bill te inn sangtawh kinai zaw ahih manin tung masa uh aa, a innsungah lut in tuivot khat peuh a dawnna dingin Bill in Mark sam hi. Tuivot dawn in TV a et kawm un tangval tegel holimna hun nuam khat a zat khit uh ciangin Mark inn hong ciah hi. Sangah zong kimu zel in kiho zel uh aa, a sawtlo in junior high school hong zo khawm uh hi.

A sangkah na uh zong kibang to suak lai aa, senior high school a zawh ma deuh ni pawlkhat in a kisap ciangin, Mark kiangah Bill in gennop pawlkhat nei ahih manin hunnuam khat zangin hong zawn hi.

A kimuh masakna pen ni vua thupiang te a mangngilhlohna Bill in gen hi. Mark aw, “Tua ni in, van tampi tak tawi netnat aa inn ka ciahna ahang na thei nuam hiam? Tua ni pen, ka sangkah tawpni dingin ka geel aa, mi khat peuh aa dingin tua locker a kizang thei pah ding ngaihsutna tawh ka vankoihna locker siansuah ka hi hi. Inn ka tun ciangin ka nu ihmutsuahna zatang tampi ne in kei le kei kisihbawl ding ka geel hi. Ahi zongin, nang tawh hunnuam zangin, kiholim theihna i neih ciangin kei le kei kithat hi leng, hih bang hunnuam ngahlo iin lawmhoih tawh kimu lo ding cih ka kiphawk hi. Mark aw, tua ni in ka laibu te bek hong toppih na hi kei aa, ka nuntakna mahmah hong honkhia in hong lamsang na hi hi” ci hi.

Nisim i kampau gamtatna neu nono te in midang khat adingin nuntakna leh thahatna piangsak thei ahih manin, kammal hoih te leh gamtat luheek dikte tawh i nisim nuntak zuun to lehang, Pasian’ itna tampi i gen thei kei zongin, mi tampi te in nuntakna ngahlawh ding ahi hi.

Galatia-te 6:2 [ZIV] Khat le khat na vangik uh kidawn tek un. Hih bangin gamta le uh cin Christ thukham na tangtun ding uh hi.

Tangthu: John W. Schlatter (true story)