Hehna Ngaidam Ding

Nupa khat a kiten zawh uh kum 60 val bang sungin ki-it mahmah uh aa, khatvei beek kam kisel kitawng cih bang omlo hi. Amau kikal ah thusim khat bek cih simloh thusim dang bangmah neilo uh hi. A zi in a bizuu sungah singkuangneu khat nei aa tua pen a pasal in hong aa a etsak loh ding cih thusim ahi hi.

Kum tampi sung tua singkuangneu thu kikup in nei ngeilo uh hi. Ahizongin, tua singkuangneu sungah bang om ahi tam cih a pasal in a theihnop hun om zelzel hi. Ni khat, a zi hong damlo aa, damkik ding lamet tawm mahmah hi. Tua hangin, a thusim nei nuam nawnlo ahih manin a singkuangneu a lakna dingin a pasal kiang gen hi.

A pasal in singkuangneu hong paipih in hong hi. Singkuang sungah khut tawh kiphan nau-milim nih leh sum $95,000 om mu hi. Tua singkuangneu sunga om nate in bang a deihna hiam cih a pasal in theinuam in lunglut mahmah in azi dong hi.

A zi in, “I kiten lai in, ka pi in nupa nuam hih theihna ding thusim khat hong gen a, tua in kam kinialna pelh ding cih ahi hi. Ka heh hun a om khak zenzen aa leh dai dide in pau dawngkik selo aa, nau-milim phan ziau in cih hong gen hi” ci hi.

A pasal zong khut tawh kiphan nau-milim nih bek mu ahih manin a lung khat nuam tuam mahmah hi. Khut tawh kiphan nau-milim nih om ahih manin a kiten kum sung khempeuh uh a zi nih vei bek heh cihna ahi hi.

Tua khit ciangin a pasal in, “Ngaihno aw, nau-milim deihna telta vengin, hih sumte ee le? Koi pan hi aa bang deihna hiam?” ci-in dong beh hi.

A zi zong, ahih theihzah in maitai kawmsa in, “Nau-milim kazuakna pan ka ngah sumte hi” ci-in dawngkik hi.

Efesa 4:26 [ZIV] Na heh sungin na mawh kei in, na heh dam loin ni na tumsak kei in.