David ading a Lianpen Gal

David tangthu akigen sim leh izak sim in Goliath i ngaihsun kha dinga, David adingin agal lianpen dingin zong i ngaihsun kha ding hi. Goliath pen alauhuai leh alian mahmah galhang khat hi a, Israel mite bek hilo Israel te Pasian nangawn simmawh bawl in ni 40 sung bang a to den ahih manin mikhempeuh in a kihtaak khat ahi hi.

Ahizongin, Goliath pen nikhat a kizo gal hi aa, Pasian muanna hang leh Pasian ompihna tawh David in manlang tak in zo in that ziau lel hi.

David nuntakna ah ahaksa pen leh anunzia a sittel lian pen gal khat om a, tua in azahtak leh a-it Israel kumpi Saul ahi hi. Atungin, Saul in David it in zong paakta mahmah hi. Himah leh, alungsim ah hazaatna hong lut ciangin Saul in David gallian pen hong suak mawk hi. Munteng gamteng ah thah dingin beng kawikawi bek thamlo in David it le ngaih te zangin thah ding tam veipi hanciam lai hi. Nikhat thu a zawhziau Goliath bang hilo in Saul pen David adingin lungsim nat-huai leh a gimhuai mahmah sawtpi ado ding gal hong suak mawk hi.

Himah leh, hih a gimhuai galdona ah David in Saul thah theih nading hun tamveipi aneih hangin, akhutme khat zong liik nuamlo hi. Ahangin Saul pen Pasian sathaunilh hi-a, Pasian thukhen ding lamen in lungduai, kiniamkhiat, leh upna lianpi tawh haksa ta leh ngak teta ahih manin Topa in gualzawhna pia hi.

Eite etteh ding thu khat in: khat veivei eite ading ahaksa leh alian pen gal in i mai aa om i tuah khak "alianpi" ze-etna leh haksatnate hikhin khinlo a, i phawk khak kholloh, athupi azong i sim khak loh innkuan sung kizopna, hazaatna, kitelkhialhna, leh lungduai a ngakna te na hi thei zaw se hi. Goliath in i hangsanna hong sittel a, Saul in i nunzia hong sittel hi.

Tua hi a, gualzawhna diktak in athupi leh alian a i ngaihsut buaina te zawhna bek hilo in, midangte hong simmawh hun ah, hong kitelkhialh hun ah, leh khatguak i kisak hunte ah i lungtang mahmah Topa tawh kinaisak in Topa mai ah thumaan tak a nisim i nuntakna ahi hi.

David gualzawhna Goliath a thahna hang hilo in kum tampi sung telkhialhna leh mawhsakna tawh Saul i do-na khempeuh ah Pasian muan ding leh Pasian mai ah thumaan ding ateelna hang hi zaw hi.