Bawngnawi Hai Khat in Lohkhin Zo

Howard Kelly pen nuntak haksa innkuan pan a khangkhia tangvalno khat ahi hi. A sangkahna ding sum zonna in inn khat khit inn khat pai kawikawi vanzuak hi. Nikhat, sunkim bang hita aa, a vanzuak lah khawng mello, a gillah kialsi, a ip sungah sum tawmkhat bek nei ahiha manin, a lutna ding inn ah nektheih khat peuh ngen dingin hong khensat hi. Ahizongin, a ithuai nungakno khat in kong a hon ciangin nek ding ngen ngam nawnlo ahih manin dawn ding tui haikhat ngen hi.

Ahi zongin, tua nungakno in tangval gimtuak leh gilkial mel sa ahih manin bawngnawi haikhat hong suah hi. Bawngnawi a dawn khit ciangin tangval in, “Sum bangzah hong pia ding ka hiam” a cih leh nungak in, “Bangmah nong piak ding kisam lo hi. Migit citna manlak loh ding ka nu in hong hilh hi” ci hi. “Nak lungdam lua mahmah ing ei” ci-in a vanzuak zom dingin tangval paikhia kik hi.

Tangval tua inn pan a paikhiat ciangin a pumpi taksa thahat zaw bek hilo in Pasian tungah a upna zong hong khauh zaw sem hi. Lungkia in tawpsan dinga kithawi khin sa ahi hi.

Kum pawlkhat khit ciangin tua numei nakpi takin a ci hong na hi. A khuatual siavuante in a cihna ding uh theilo ahih manun khuapi sunga zato ah paisak uh hi. Ama natna tuamdang deuh ahih manin tua natna a telkan mahmah siavuan kisam ahi hi.

Tua natna a en dingin Dr. Howard Kelly kisam hi. Dr. Howard Kelly pen Johns Hopkins University ah Gynecologic Oncology a phuan khia pa hi aa, Gynecologist (Numei-te natna tawh kisai siavuanpi) siavuan minthang khat ahi hi. Cina numei a hong paina khua min a zak ciangin lunglut semsem hi. A zumkhan sung panin hong dingkhia pah aa, cina mu dingin hong pai hi. A muh lian leh tua cina-nu pen kua hiam cih tel pah hi.

Tua numei natna a bawl zawh ding lunggulh mahmah aa, nakpi tak hong hanciam hi. Sawtsim hong bawl khit ciangin numei a natna panin hong damta hi.

A sumbei khempeuh a sit theihna dingin zato sumsazian bawl te kiangah Dr. Howard Kelly in tuanu bill hong ngen hi. Tua sumbeina lahna laidal a etcian khit ciangin laidal nuai lam ah laitawmno khat at in a minciaptehna hong gelh hi. Lai-ip sungah guangin numei kiang laidal a kipiakna ding thupia hi.

Sum tampi bei dinga alohkik na dingin kum tampi a hanciam kul ding cih thei ahih manin numei in lai-ip hong ngam pak hetlo hi. A sawt ciangin lai-ip hong aa, laidal hong et ciangin laidal tawkiu ah a mit a la mahmah lai kigelh khat mu hi.

“Bawngnawi hai khat tawh a vekin kilohkhin hi”

Dr. Howard Kelly (Signed)

Lungdamna khitui a biangah tak keuhkeuh kawmin, “Topa aw, nuam lua mahmah sing” ci-in gen ding dang zong thei paklo in om hi.

Hebrew 13:2 [ZIV] Mikhualte zindo ding mangngilh kei un; tua banga a hih pawlkhatte in a theih loh kalun van sawltakte a zindo uh ahi hi.

Thuhilhna 11:1 [ZIV Tuite tungah na anlum lawn lecin ni tampi khit ciangin na mu kik na ding hi.

Matthew 25:35-36 [ZIV] Ka gilkial laitakin ka nek ding nong pia uh a, ka dangtak laitakin ka dawn ding nong pia uh hi. Mikhual ka hi laitakin zin nong do uh hi. Puan ka neih loh laitakin nong silhsak uh hi. Ka cinat laitakin nong khoi uh a, ka thong kiat laitakin nong veh uh hi,’ ci ding hi.

Matthew 25:40 "Kumpipa in, ‘Thutak kong gen-inah, hih ka sanggamte a neupen khat adinga na bawlte khempeuh uh kei adinga hong bawl na hi uh hi,’ ci-in dawng ding hi.

Tangthu: Howard Kelly Biography (Audrey Davis)