A Kawm Zeisu (Jesus the Borrower)

Khat veivei leitung i nun sungin bangmah nei kisa lo, daipaam, pangpa, thanem in ki om thei aa, lungkia in a khateem mi tampi om thei hi hang. Mite bangin neih le lam ki cing lo in leitawi, nektawm zong in akpi bangin ki nungta to zel hi. Hih bang nuntakna tawh a khangkhia Zomi te’ adingin tuni in lungdamthu kong puak nuam hi.

Matthew 6:33-34 “Thudang khempeuh sangin Pasian’ ukna leh ama deihna na zuih theihna ding uh thupi ngaihsut masazaw un. Tua hi leh hih na kisapna dangte khempeuh uh zong hong piathuah veve ding hi. Tua ahih manin zing ciang huna ding ma lungkham masa kei un. Zing ciang thu ding ama thu-in omsak lel un. Tuni thu pen tuni thu mah tawh beisak un la, lungkham ding behlap se kei un. “

Topa Zeisu leitung ah anuntak lai in limlahna (examples) tampi tak tawh nungta aa, lungmuanna leh lam-etna i ngah theih nadingin amahmah eite aa’ dingin hong nungta hi.

Zeisu in bang nei hiam? Bangci bangin leitung ah hong nungta hiam?

1. Zeisu hong suah dingin a om nading mun neilo ahih manin, Mary gil hong kawm in (naupaai) mihing pumpi hong la aa leitung ah hong suak hi.

2. Zeisu hong suah ding ciangin suah nading inn le mun neilo ahih manin Bawngbuk hong kawm hi.

3. Zeisu Bethlehem pan in Egypt gam ah a nu le pa tawh a gaal tai dingun mipil te’ itpiak (gift) teng mah tawh hong ki naamtaak in leitung nuntakna ah hong khangkhia hi.

4. Zeisu lungdamna thu tangko dingin hong ki pat ciangin nungzui le mi kua mah nei hetlo ahih manin Tuipi gei aa ngabeng te hong zawn aa nasep hong ki pan khia hi.

5. Zeisu thugenna ding leh khualzinna dingin bang mah neilo sawnsawn a hih manin Gunkuang hong kawm in Pasian’ nasep hong kipan khia hi.

6. Zeisu leh Peter te siah (tax) pia dingin a kinget ciangin ngasa kam sungpan in sum hong la tawm in siah hong pia uh hi.

7. Zeisu in zintunna ding leh annekna ding mun nei khollo hi mai ve….Mary, Martha leh Lazarus te’ inn ah hong zintung zel hi.

8. Zeisu in a thungai mipi te it mahmah aa, a gil kial laitak un anvak nuam mahmah ta leh bangmah neilo mawk ahih manin naupangno khat i ngasa tawn 2 leh mohlum 5 tawh mipi te an hong vaak hi.

9. Zeisu minthanna tawh Jerusalem hong lut ding ciang na ngawn in zong a tuanna ding laa, sakol neilo a hih manin mi’ aa a kawm dingin nungzui te nih sawl aa tua laa tawh Jerusalem hong lut hi.

10. Zeisu in a tawpna nitak-an (The Last Supper) hong nek dingciang in zong annekna ding inndei (room) neilo ahih manin midang aa mah hong kawm zel aa tua teng ah nungzui te tawh paisan pawi hong ne uhhi.

11. Zeisu hong sih ding ciangin Singlamteh amah kia in pua zolo a hih manin Simon a ki ci mipa’ huhna tawh Calvary mual hong tung zo hi.

12. Zeisu ei te’ aa dingin hong si aa, a ki vui na dingin hann (tomb) na ngawn nei lo ahih manin Joseph hann hong kawm aa tua teng ah hong ki vui ta zen hi.

Tua ahih manin Zeisu in zingciang aa ding lunghi mawh kei un, A Gam leh A Dikna zong masa ung hong cih mah bangin Amah muang ngeungau mawk leng……..Zeisu in na nuntak zia, leitung nunzia ong telllua hi. Amah mah hong nungta hi ven… Amah muang ngam lel in.